أرشيف التصنيف:Uncategorized

التقدم التكنولوچي والعلمي اللي بنمر بيه في عصرنا غير جوانب كتير من حياتنا للأحسن ، سواء من ناحية التواصل الاجتماعي او توافر غذاء اكتر او توافر رعاية طبية متقدمة افضل لكن للاسف بالرغم من أهمية التقدم العلمي إلا أن احتمالية انه يحصل كارثة عالمية تؤدي لانقراض البشر زادت مقلتش !

طب ايه هي اهم الكوراث اللي ممكن تؤدي لانقراض البشر ؟

1- الحرب النووية

دول كتير في العالم بالذات الدول المتقدمة بتسعي بكل جهدها لامتلاك اسلحة نووية منهم دول عندها بالفعل اسلحة نووية مدمرة زي روسيا وامريكا والصين والهند وباكستان وغيرهم طب لو حصلت ازمة سياسية كبيرة بين الدول دي وبعضها وحصلت حرب نووية تفتكر ايه هيحصل في العالم ؟

لو افترضنا انه حصل حرب نووية علي الضيق كده بين الهند وباكستان مثلاً ده هينتج عنه تصاعد ٥ مليار كيلو جرام من الدخان والغبار ! واللي بدوره هيقلل درجة حرارة الارض بحوالي 1.25 درجة مئوية ” دي نسبة كبيرة” هتدخلنا في شتاء نووي و عصر جليدي مُصغر كده ، هيؤدي الي نقص كبير في الغذاء وتأثيره هيبقي عالمي

لكن لو حرب نووية كبيرة بين امريكا وروسيا مثلا فالكارثة هتبقي اكبر بكتير ، درجة الحرارة هتنخفض بحوالي ٧ درجات مئوية لسنين كتير وهيبقي عصر جليدي رسمي ، ده غير ان كميات الدخان والغبار هتبقي كبيرة حدا وكافية لحجب الشمس تماما وبالتالي وقف عملية البناء الضوئي و بالتالي مجاعات واختلال بيئي هيأثر علي الكوكب كله !

تأثير القنبلة النووية في نطاق حدوثها (١٦ كم) هيؤدي لموت كل الافراد فيه تقريباً ودول المحظوظين ! لأنه اللي هيعيش هيتمني لو كان مات ! لأنه هُيصاب بحروق بشعة وسرطانات ، وباقي العالم مش هيسلم من البشاعة دي لانه الدخان المتصاعد ده هيعدي علي العالم كله وهيعمل امطار حمضية هتسمم الحيوانات والمحاصيل وهيسبب سرطانات و طفرات چينية في الحيوانات والمحاصيل والبني ادمين !

ده غير الحروق الكبيرة اللي هتحصل وهتبتلع مساحات كبيرة في طريقها .

2- اوبئة

الهندسة الوراثية والبايوتكنولوچي مهمة جدا في تصنيع وتعديل منتجات غذائية كتير في حياتنا بس ماذا لو اسُتخدمت عشان تصنع ڤيروسات مميتة وسريعة الانتشار ؟

العلماء بشكل عام قلقانين من الاوبئة وتأثيرها لكن اسوأها علي الاطلاق هي اللي ممكن يصنعها الإنسان لأن لو ڤيرس ظهر بشكل طبيعي من البيئة مش هيبقي معدي ومؤذي زي ڤيرس اتصنع أساسا ً عشان يقتل البشر

3- الاحتباس الحراري

الاحتباس الحراري هو الكارثة اللي بنواجهها حالياً واثارها بتزيد كل سنة عن السنة اللي قبلها وبالفعل انقرض انواع كتير من الحيوانات ولو البشر ماخدوش الإجراءات اللازمة هيؤدي في النهاية لانقراضنا طب ازاي ده ممكن يحصل ؟

الاحتباس الحراري الاول معناه انه نسبة ثاني أكسيد الكربون والميثان وغازات تانية ضارة بتزيد تدريجياً في الغلاف الجوي ومن الطبيعي ان الغاز ده مهم جدا في تدفئة الأرض لانه بيحتفظ بأشعة الشمس لفترة أطول والارض طول حياتها من قبل وجودنا كان بيحصل فيها ده بشكل طبيعي وثاني اكسيد الكربون اللي بينبعث من الانفجارات البركانية و من الطبيعة بيقوم بالدور ده بشكل كويس لحد ما البشر ظهروا وظهر معاهم البترول والوقود الحفري و اللي خلي انبعاثات ثاني اكسيد الكربون تزيد بشكل كبير جدا خلي يحصل احتباس للحرارة داخل الغلاف الجوي و مع قطع البشر للاشجار وحروق الغابات و تلويث المحيطات واللي كانت بتمتص ثاني اكسيد الكربون خلي المشكلة تزيد بشكل اكبر واكبر وبالتالي درجة حرارة الارض زادات حوالي ١ درجة مئوية ” تأثيرها كبير” معدل الزيادة ده بيزيد كل فترة عن اللي قبلها لدرجة انه تتضاعف في اخر ٤٠ سنة و بالتالي عشنا بالفعل احر خمس سنين في اخر فترة من2015 للوقت الحالي ، تأثير كل ده هيتمثل في ان القطبين الشمالي والجنوبي الجليد فيهم هينصهر بالتدريج وهيؤدي لارتفاع مستوي البحر و الفيضانات وبالتالي نزوح ملايين من البشر عن بيوتهم ده غير المجاعات اللي هتحصل بسبب ارتفاع درجة الحرارة والجفاف و الفيضانات ، الاحصاءات العالمية بتقول ان حوالي 250 الف انسان هيموت كل سنة وحوالي 100 مليون هيبقو فقرا بسبب الاحتباس الحراري بحلول سنة 2030 ، التأثير علي الحيوانات والكائنات البحرية عظيم جدا و بالفعل احنا دخلنا عصر انقراض اساسا وراح ضحيته آلاف الانواع من الحيوانات والكائنات البحرية واللي كانت مش بس مصدر غذاء مهم لينا لكن كمان بتساهم في التوازن البيئي و تقليل نسبة ثاني اكسيد الكربون ومصدر رزق للصيادين في أنحاء العالم اللي حالياً بيواجهو معاناه كبيرة مع انقراض نسبة كبيرة من الكائنات البحرية ، كده باختصار اللي هيحصل ⬅️ انصهار الجليد ، ارتفاع مستوي البحر ، فيضانات ، نزوح ملايين البشر عن مواطنهم وتشردهم وبالتالي زيادة معدلات الفقر ، انقراض عدد كبير من الحيوانات والكائنات البحرية اللي مش هتعرف تتكيف مع التغييرات دي ، جفاف ونقص المياه مع ارتفاع درجات الحرارة ، عواصف شديدة وتغيير مناخي هيخلي الأمراض والاوبئة تزيد زي الملاريا .

الاحتباس الحراري هو كارثة بنواجهها حاليا و يمكن مش بايدينا حاجة نعملها اوي في الموضوع بس حتي المساهمات البسيطة ممكن تفرق زي :-

1- مقاطعة الشركات اللي بتستخدم زيت النخيل في منتجاتها لانها بتصنعه من اشجار بعد ما بتحرق الغابات و تدمرها ده غير انه زيت ضار ومسرطن اصلا .

2- كمان اللحوم بسبب طريقة تربية المواشي في تجمعات كبيرة وطرق تغذيتها في المزارع الضخمة فنسبة الميثان اللي بتخرج منها كبيرة جداً و الغاز ده ضار بطريقة اسوأ من ثاني اكسيد الكربون * مش هقول نبطل لحوم بس علي الاقل نقتصد فيها* ولانها برضو ضارة صحياً علي المدي الطويل .

3- السكر

قصب السكر اللي بيتصنع منه السكر بيستهلك مياه ومبيدات حشرية بنسبة كبيرة واللي بالتالي بتزود التلوث اكتر كمان هو محصول ضار وبيأذي التربة و يخليها تفقد الكربون اللي فيها واللي وجوده في الغلاف الجوي هيسبب تفاقم الازمة اكتر. بالاضافة لكون السكر برضو ضار صحياً وبيسبب السمنة و مرض السكر علي المدي البعيد .

4- الشوكلاتة

للاسف الشوكلاتة ضارة للبيئة لانها بتتصنع من الكاكاو واللي يُعتبر برضو محصول ضار جداً للبيئة لانه بيحتاح كمية مياه كبيرة و بيأذي التربة ده غير انه بيحتاج متطلبات مناخية معينة متواجدة في بلاد معينة في العالم زي البرازيل واندونسيا ونيچيريا ، وعشان متطلبات العالم من الشوكولاتة زادت بقي مطلوب زراعته بشكل مكثف جدا بيخلي المزراعين يشيلو الغابات عشان يوفرو لي مساحة وكمان ده بيخلي يحصل خلل في التوازن بين المحاصيل وتركيز علي محصول معين .

5- استهلاك الاسماك وبعض انواع الفواكه والمحاصيل مؤذي للبيئة برضو ، لان استهلاك الاسماك بنسبة كبيرة هيأذي البيئة البحرية و هيقضي علي انواع كتير منها ، برضو الموز والمانجو اللي بيحتاجو كمية كبيرة من المياه والمبيدات الحشرية والأرز اللي بيحتاج كميات كبيرة من المياه برضو واللي بيطلع ميثان اكتر حتي من مزراع تربية المواشي .

الوقت دايما زي ما احنا عارفين ماشي في خط مستقيم كل لحظة بتفوت مستحيل نرجعلها تاني و دايما كل احداث حياتنا ماشية للمستقبل مع استحالة انك ترجع للماضي او تنط للمستقبل طب ليه الوقت مش زي المكان ؟ ليه بنقدر نروح يمين وشمال ونسافر من مكان للتاني بس مبنقدرش نعمل نفس الحاجة في الزمن ؟ ده نفس السؤال اللي حير العلماء لحد النهاردة بس اول من غير مفاهيمنا عن الزمن وخلانا نبص للزمن نظرة مختلفة هو اينشتاين اللي عمل نظرية النسبية اللي غيرت كل حاجة وقتها وخلتنا اختصارا كده نفهم أن الضوء له سرعة ثابتة ، وأن الزمن بُعد رابع زي المكان ” الزمكان ” ، تالت حاجة وهي اساس موضوعنا أن الزمن مرتبط ارتباط وثيق بسرعة الضوء وانه الزمن مش ثابت علي كل الكون لأ ده بيختلف علي حسب السرعة والكتلة بمعني ان كل ما سرعة جسم تزيد ” بحيث تقرب لسرعة الضوء ” الجسم ده هيمر عليه الوقت ابطأ من جسم ساكن فمثلا لو جبت تؤامين وخدت واحد منهم وخليته يسافر بسرعة الضوء ” افتراضاً” والتاني يفضل علي الأرض الاولاني الزمن هيمر عليه ابطأ لدرجة توصل تقريبا للنص ! يعني لو سافر واستغرق في الرحلة دي ٥٠ سنة هيرجع يلاقي اخوه التؤام مر عليه الزمن هنا ١٠٠ سنة !! ودي الطريقة اللي تقدر بيها تسافر للمستقبل بافتراض انك عندك قدرة اصلا انك توفر طاقة كافية تخليك تسافر بسرعة مقاربة لسرعة الضوء ، لانه مستحيل تقدر تسافر بسرعة الضوء لأنه علي حسب نظرية اينشتاين كل ما سرعة جسم بتزيد كتلته بتزيد فتخيل انك بتسافر باعلي سرعة في الكون ! الكتلة هتبقي لانهائية وهتحتاج طاقة لانهائية بالتالي عشان تخليك تكمل وده مستحيل وبالتالي علمياً انت تقدر تسافر بسرعة مقاربة للضوء المهم تكون اقل بس يا تري هتحس بأيه وانت مسافر بكمية السرعة دي ؟

زي ما قولنا اول حاجة ان الوقت هيمر عليك أبطأ للنص تقريبا لو بتسافر بسرعة ٩٠٪ من سرعة الضوء ، مجال رؤيتك هيختلف تماما هتبقي شايف العالم كأنك بتبص من نفق ضيق اوي و النجوم اودامك هتبان لونها ازرق ووراك هتبان حمرا وده لأن موجات الضوء هتتجمع اودامك وتبان باللون الازرق ووراك هتنتشر وتتفرق فيبان لونها أحمر ودي ظاهرة اسمها doppler effect ، عند سرعة معينة مش هتشوف حاجة خالص غير سواد لأنه موجات الضوء اللي هتبقي موجود هتبقي خارج مجال رؤيتك أصلا .

تاني طريقة ممكن تسافر بيها للمستقبل علي حسب نظرية اينشتاين هو لو قربت من مكان قوة الجاذبية فيه عالية لأنه هيمر الزمن فيه ابطأ ، اعلي مكان فيه جاذبية في الكون كله هو الثقوب السوداء ولو شوفت فيلم intersteller هتلاقي نفس الفكرة ، انه مجرد وجودك في كوكب قريب من ثقب اسود بيخلي الزمن يمر عليك ببطأ شديد لدرجة انه الساعة فيه ب 7 سنين علي كوكب الأرض ، طبعا دي افتراضات وحاجة مستحيل نطبقها لانه اقرب ثقب اسود لينا علي بُعد تلات الاف سنة ضوئية ! والثقب الأسود بيبلع اي حاجة حواليه حتي الضوء نفسه ! ده غير انه مبيسبش حاجة دخلته تطلع تاني .

تالت طريقة هو انك تخلي جسمك يوقف كل انشطته الحيوية مؤقتا بحيث تقلل وعيك ووعي جسمك بالوقت وتدخل في حالة شبيهة باللي بتعمله بعض انواع البكتيريا وبيخليها تعيش ملايين السنين ! وبعض الحيوانات برضو اللي بتدخل حالة سبات شتوي ، فانت بتدخل في حالة السبات دي وبعد كده ترجع وظائفك الحيوية تشتغل تاني بعد ما يمر وقت بحيث تلاقي نفسك في المستقبل هي دي فكرة النظرية ، طبعا الفكرة شبه مستحيلة علي البشر ، العلماء جربوها علي الفئران ونجحت بس علي الحيوانات التانية فشلت وده يدل انه معندناش تكنولوچيا كافية لعمل كده او ان الإنسان جسمه مش مهيئ لده.

اخر طريقة ودي مستحيلة 😀 وهي انك تدخل ” ثقب دودي ” وده باختصار عبارة عن اندماج ثقب اسود وثقب ابيض

طب ايه هو الثقب الاسود والأبيض ؟ الثقب الاسود ده ناتج عن انفجار نجم ضخم اضخم من الشمس ٢٠٠ مرة النجم ده لما بينهار تماما بيسيب مكانه الثقب الأسود واللي بيبقي قوة الجاذبية فيه عالية جدا و اي حاجة بتدخله مبتطلعش تاني

الثقب الابيض ناتج عن انفجار نجم ضخم برضو بس النجم ده بدل ما ينهار كون الثقب ده اللي بيعمل عكس الثقب الاسود ومفيش اي حاجة بتدخله بيعمل كأنه exit بس .

ومن هنا جت فكرة الثقب الدودي للعلماء بأنه الثقب الأسود والأبيض يتحدو سوا ويتكون ثقب دودي اللي هتدخله عن طريق الثقب الأسود وتبقي سرعتك ابطأ وبالتالي تسافر في المستقبل وتخرج عن طريق الثقب الأبيض بس طبعا الثقب الدودي والابيض دول افتراضات نظرية متثبتش وجودها فعلياً .

كلنا بنحلم كل يوم سواء بنفتكر الاحلام كلها او لأ بس كلنا بتعدي علينا احلام معينة بتعلق معانا وبنبقي مش فاهمين ايه معناها ، مبدأياً احلامنا مصدرها عقلنا الباطن و عقلنا الباطن ده قوة عظيمة ليها تأثير كبير في حياتنا وبيظهر دوره بشكل كبير واحنا نايمين وكأنه بيستبدل دور عقلنا الواعي ، و العقل الباطن لغته عواطف ورموز بس بمعني انه بينبهك لعواطف انت مش واخد بالك منها او متجاهلها في حياتك او لصدمات عاطفية و نفسية واجهتها زمان ولسه مأثرة عليك حالياً بس للاسف مش بيوجهك لده بشكل مباشر لأنه لغتة رمزية وده اللي هنفهمه وازاي فيه رموز في احلامنا وبيبقي معناها ايه في الاحلام الشائعة اللي اغلبنا حلمها في حياته مرة علي الأقل

1- حلم الوقوع من مكان مرتفع

الحلم ده يعتبر اكتر حلم شائع وتفسيره الاقرب في اللي قريته هو ان الشخص ده بيبقي خايف من الفشل في حياته الواقعية او انه عقله الباطن بينبهه ان فيه حاجة غلط بيعملها حالياً في حياته ولازم يعيد تفكير تاني فيها و تفسيرات تانية بتقول انه لو بيقع و هو سعيد ومش خايف فده معناه انه مش خايف من التغييرات اللي بتحصل في حياته ومبسوط بيها ولو الوقوع ده في مياه فغالبا بيقع في حب حد

2- حلم فقدان الأسنان

اول تفسير لي انه الشخص ده بيبقي غالبا مش عنده ثقة في مظهره او عنده قلق وخوف انه يبان مش جذاب وده لأن الأسنان جزء مهم اوي من شكلنا وفقدانها بيأثر بشكل كبير علي مظهرنا و بالتالي العقل الباطن استخدمها كرمز

او انه الشخص ده بيمر بفترة نضج وتطور في حياته وشخصيته و الأسنان بتمر بنفس الشئ ، واحنا صغيرين بنبدل اسنانا بسنان تانية وده بيدل اننا بنكبر وبندخل مرحلة جديدة

او علي حسب كلام فرويد ان الشخص ده بيمر بتغيير جذري في حياته وده لان التوتر والالم اللي بيحصل مع فقدانها بيبقي رمز للتوتر اللي بيحصل مع التغييرات الجذرية اللي بتحصل زي فقدان شخص مهم او الانتقال لبيت جديد او قبول وظيفة جديدة

او كتفسير سلبي شوية انه عقلك بينبهك انه القررات اللي مفروض تاخدها ومأجلها ممكن تؤدي في النهاية لأيه ، لانه الاسنان لو اهملتها برضو هتضطر في الاخر تخلعها

3- الحمل

الحلم ده بيدل علي فكرة او مشروع او خطة بتنمو في حياتك او فكرة لسه بتفكر فيها ومخرجتش للنور وبالتالي الحمل بفتراته بيدل علي مراحل نمو الفكرة بمعني لو الشخص حلم انه في الشهور الاخيرة من الحمل فده بيدل انه الفكرة علي وشك انها تخرج للنور وتغير حياته وتعقيدات الحمل بتبقي رمز لتعقيدات الفكرة بمعني انه لو الحلم فيه حمل في توأم فده بيدل علي انه الحاجة اللي بتكبر في حياته او بيخططلها دي ليها جوانب كتير و صعبة انها تتحقق ولو الحلم فيه ولادة وكانت متعسرة او حصل فقدان لطفل فيها فده تنبيه من العقل الباطن انه ممكن يخسر الحاجة دي لو مفكرش وخطط كويس ليها ولو الحمل ده في كائن غريب ” مش بشري” فده ممكن يبقي معناه ان الفكرة او التغيير اللي هيحصل في حياته غريب ومبهم بالنسباله

او لو فيه ولادة بس من غير الم فدي طمأنة عقلك الباطن ليك انه الحاجة اللي بتخططلها او المشروع ده مش هيبقي بالصعوبة اللي انت قلقان منها

4- حلم المطاردة

غالبا بيدل انه الشخص ده بيهرب من حاجة في حياته الواقعية وخايف يواجهها سواء مشاكل مادية او عائلية او علاقة ، لو الحلم فيه مطاردة من شخص معين فبيبقي الشخص ده فيه رمز للي بيهرب منه لو هو مثلا شخص انتقادي فده بيدل انه بيهرب من انتقادات نفسه لي ” جلد الذات ”

ولو مطاردة من حيوان فمفروض تشوف اول حاجة بتيحي في دماغك لما تفكر في الحيوان ده وبتبقي غالبا هي رمز للحاجة اللي انت خايف تواجهها

لو الحلم حصل في مبني غريب فده مطاردة جوه عقلك بتدل انك بتحس انك خايف تواجه جوانب من شخصيتك حاسس انها مش مألوفة او غريبة عنك

لو الحلم في مكان بره مبني زي صحرا مثلا فممكن تتخيل لو المكان ده له شخصية هيبقي ايه ؟ يعني لو بتحصل المطاردة جوه صحرا فغالبا الرمز ليها انك بتخاف تكون وحيد أو ممل و كئيب

5- حلم الاشباح

لو الحلم هو انك بتُطارد من شبح فده بيدل علي خوفك من المجهول و الحلم ده شائع جداً للاشخاص القلوقين لانهم دايما بيخافو من المستقبل اللي بيبقي بالنسبالهم مجهول ومخيف

لو الحلم انك نفسك بتتحول لشبح فده احساس بالذنب والخوف من حاجة حصلت في الماضي او تعبير عن تعرضك للحزن وفقدان شخص قريب

6- حلم بشخصيات مشهورة

ظهور شخص مشهور في الحلم فده رمز لحاجة انت محتاجها او مفتقداها في حياتك زي جانب من جوانب شخصيته او حاجة هو مشهور بيها او حتي ذكرياتك عنه

اما لو حلمت انك نفسك بقيت مشهور فده ممكن يبقي تفسيره العكس تماما وهو انك حاسس انك محتاج تقدير و معرفة الناس اللي حواليك بيك

لو الحلم بشخص مشهور بتحبه جدا فده بيدل انك عايز يبقي عندك صفات من الشخص ده او التفسير. السئ انك ممكن تكون شخص حسود في الحقيقة او حاسس انك عايز يبقي عندك اللي عند الناس التانية و احساس ان اللي عندك مش كافي

7- حلم الامتحان

ده تقريبا اكتر حلم بيتكرر عند الناس كلها بالذات قبل أحداث مهمة في حياتهم او قبل قبول وظيفة جديدة او قبل حدث مهم في شغلهم ، وده لأن المدرسة كانت اول تجربة شغل مصغرة في حياتنا والامتحانات كانت اول مصدر توتر قابلناه في حياتنا عشان كده بتبقي دايما رمز لكل مخاوفنا بعد كده ، الحلم بيدل علي خوفك من الفشل ، كمان الامتحان عبارة عن تجربة بنتحط فيها عشان نواجه نواقص في شغلنا او مذاكرتنا وده اللي بيخليه يتكرر قبل اي حدث حاسين اننا مش مجهزين لي كفاية او خايفين اننا نفشل فيه وتبان نواقصنا دي

8- حلم الموت

سواء حلم موت الشخص نفسه او حد عزيز عليه فبيدل علي حاجات كتير منها الخوف والقلق من التغيير وده لان زي الموت ماهو تغيير كبير و الجانب التاني منه مخيف بالنسبة لأغلب الناس فالتغيير بيُرمز لي بالموت

من ضمن معناياه برضو انه فيه تغيير كبير حصل في شخصيتك وانك بتفتقد صفة اتغيرت فيك * ماتت بالنسبة لعقلك الباطن* بسبب ظروف اتحطيت فيها ، فلو حلمت ان شخص عايش عادي في الحياه الواقعية مات في الحلم دور عن الرمز اللي بيمثله الشخص ده والصفة اللي بيملكها وانت افتقدتها

طبيعة الموت بترمز لطبيعة. التغيير اللي حصل بمعني لو الموت كان طبيعي وغير مؤلم فبيدل أن الصفة اتغيرت طبيعي مع الزمن لكن لو حادثة قتل عنيفة فده بيدل انه حصل تروما وتغيير مفاجئ

9- حلم فقدان الموبايل

يمكن هو مش شائع زي الباقي بس هو حلم اتكرر معايا فحبيت اعرف تفسير لي

اول تفسير لي هو ان الموبايل بقي يرمز في عصرنا للتواصل واننا تقريبا من غيره بنبقي شبه معزولين عن الناس ففقدانه في الحلم بيرمز ان الشخص ده بيحس انه معزول ووحيد في حياته في الفترة دي او انه عنده مشكلة في التواصل مع الناس وبالتالي بيبقي معزول عنهم

او ممكن يكون الحلم لشخص معين حاسس انك فقدت التواصل معاه سواء فعليا او علي مستوي اعمق فانك بتتكلم معاه ومش عارف فعلا تتواصل بشكل حقيقي

او ممكن يبقي معناه انك حاسس انك مش عارف تعبر عن مشاعرك الحقيقية ومخاوفك للناس حواليك

10- حلم الزواج من شخص غريب

الزواج في الحلم ممكن يرمز لحاجات كتير وبيختلف علي حسب شخصية كل واحد ونظرته للجواز ممكن يبقي حلم لحد وممكن لحد تاني يبقي سجن لكن الاكيد انه الزواج من شخص غريب عمرنا ما عرفناه ده كابوس لأي حد فعشان كده الجواز في الحلم ده هيرمز لمشكلة طويلة الامد واحساس انك محبوس جواها ومش عارف تخرج منها .

اخر حاجة هو ان كل الاحلام دي في الاخر بتعتمد علي الرموز و الرموز بتختلف من شخص للتاني علي حسب شخصيته وبيئته وعوامل تانية كتير فالفكرة هو ان كل حلم نحلمه نفكر فيه كويس ونحاول نفهم عقلنا عايز يقول ايه عشان نفهم المرحلة اللي بنمر فيها لأن عقلنا الواعي من كتر زحمة الحياه والاحداث اللي بتحصل مش بيبقي واعي لمشاعرنا والحاجات العميقة دي اللي بينتبه ليها عقلنا اللاوعي .

اعلم اني ربما تأخرت وربما لن اجد ما فقدته ابداً ولكني ارجو ان تهتم بما فقدته عندنا تقرأ قصتي . في الشهر الماضي وتحديداً يوم الخامس عشر من ديسمبر كنت علي متن القطار لزيارة والدي في المستشفي وعندما كنت أهم بالنزول اخبروني في الهاتف أن حالة والدي ساءت اكثر فأصبحت تائهة و غير مدركة ما الذي يجب أن اشعر به او افعله فقط تساقطت دموعي و توجهت مسرعة للنزول فور وقوف القطار بالمحطة تاركة ورائي كتابي حتي اني نسيت رقم مقعدي ولا ادري حتي اين يجب ان تبحثوا وهل اخذه احد الركاب الفضوليين ؟ ام وجده احد الأطفال ومزقه مائة قطعة ولكني فقط اتمني ولو مرة في حياتي ان تحدث الاشياء كما اريد وان تأتي الرياح كما اشتهي .

قصتي تبدأ منذ الطفولة فمنذ عامي الاول في الحياه وابي يعتبر يوم مولدي يوم عيد وبهجة له وللعالم أجمع ! فكانت له طقوس معينة كل عام حتي انه اخبرني بالتفاصيل عن تحضيراته لأعياد مولدي التي لم تُسجل في ذاكرتي وسجل لها مقاطع ڤيديو لنشاهدها معاً ، حتي جاء عيد مولدي الثامن عشر وبرغم اني اصبحت فتاة ناضجة وذاهبة الي عامي الأول الجامعي الا انه تعامل معي كطفلته كما اعتاد دوماً ولكن هذا العام كان مميز فايقظني ذلك اليوم علي نغمات اغنيتي المفضلة لفرانك سيناترا ثم أخذ بيدي الي المطبخ ليعد لي وجبة الإفطار المفضلة لي وهي الأومليت وبعد تناولها أخذني في نزهة الي حديقتنا المفضلة في وسط المدينة ثم أعطاني ادوات الرسم من حقيبته وطلب مني ان ارسم جزئي المفضل مما حولي ورغم تذمري اني لا أجد نفسي فنانة جيدة واني ربما لن انجح في كلية الفنون الجميلة إلا انه اخبرني أنه مؤمن اني يوماً ما سأصبح من افضل فنانين العالم واني موهوبة منذ صغري واني لا يجب ابداً ان ايأس او افقد ايماني بنفسي ومن ثم بدأت بالرسم وعندما انتهيت احضتنني واخبرني انها من اجمل ما رأي ثم ذهبنا الي البيت فعلقها علي احد جدران المنزل في احد الأركان القليلة غير المشغولة بلوحاتي الأخري ثم اعد لي قالب الحلوي و احتفل بعيد مولدي وهو يتمني لي امنية مميزة لهذا العام وهي ان احيا بروح طفل برئ و بحكمة امرأة ناضجة وبقلب امرأة واقعة في الحب لتوها و بقوة عزم رجل علي تحقيق المستحيل ثم اهداني هذا الكتاب الذي فقدته الآن بعدها بعشرة أعوام ! هذا الكتاب يضم صور حمل والدتي بي و وصايا والدتي ونصائحها لي والتي جمعها ابي في كتاب واحد فأمي كانت مريضة وحملت بي وهي تعلم انها ستموت بمجرد ولادتي وبمجرد علمها اني فتاه وحتي لا اشعر بأني وحيدة بلا نصائح ووجود ام في حياتي وجهت امي كل اهتمامها طوال فترة الحمل علي كتابة كلمات حب وتشجيع لي في كل مرحلة من حياتي و نصائح وتوجيهات لي اعطاها لي ابي كل عيد مولد لي متفرقة حتي قرر ان يجمعهم معاً لأشعر ان امي معي دوماً . الآن اصبحت كما توقع ابي وحققت نجاحي في الفن بمساندته وتشجيعه وتشجيع امي ولكنه رحل ايضا الآن ولم يفعل مثل امي ويترك لي نصائح لما تبقي من حياتي . اشعر بالغضب منه لأنه لم يعطنِ فرصة لتودعيه ، لم يخبرنِ ماذا افعل فيما تبقي من عمري بدونه ، لم يرِ زوجي المستقبلي فأنا لم اكن محظوظة مثله هو وامي في الحب ، لم يرِ ويقبل أحفاده ، لم يخبرنِ ماذا افعل عندما امر بأزمة منتصف العمر وماذا افعل عندما اتشاجر مع زوجي وماذا أفعل عندما يصيب احد من اولادي مكروه ، حتي اني فضلت ان يودعني هو علي أن اودعه ولكنه القدر ان يتركني لحزناً عميق وكتاباً مفقود والآن كل ما اوده من العالم في هذه اللحظة هو عثوري علي الكتاب وسيكون هذا عزائي الوحيد .

تخيل لو جبت جهاز كمبيوتر وحاولت تخزن عليه معلومات وتحفظها وجيت تشوفها بعد فترة لاقيتها اتغيرت ! ولاقيت الكمبيوتر بيتلاعب بيها ومش بس كده ده كمان بيمسح اللي مش عاجبه منها وبيخلي اللي هو عايزه بس ! طبعاً هتمسك الكمبيوتر ده وترميه في الزبالة ، فتخيل ان جهاز الكمبيوتر الخربان ده هو ذاكرتك ودماغك وأنه المعلومات اللي بتحفظها عليه دي هي الاحداث اللي بتحصلك كل يوم في حياتك ! فأنت مش هتقدر ترمي دماغك لأ ده انت مضطر تتعايش معاها حياتك كلها ومضطر تتعامل مع تلاعب دماغك في ذكرياتك ده ، فعشان كده اول حاجة لازم تعرفها ان دماغك وذاكرتك غير الكمبيوتر تماماً .
الأول خلينا نعرف إزاي بنخزن الذكريات اصلا وايه الفرق بين الذاكرة قصيرة المدي والذاكرة طويلة المدي ؟
مخنا علي مدار اليوم بيتعرض لكمية معلومات كبيرة حتي واحنا نايمين وفي ظل الزحمة دي كلها مينفعش ياخد كل المعلومات دي كده ويخزنها ، دي حاجة تفوق قدرته فلذلك خُلقت الذاكرة قصيرة المدي اللي هي بنتعامل بيها في اغلب مهامنا زي انك تعمل كوباية شاي او تفتح الباب مثلا او تنقل رقم من حد واللي اكيد بعدها بدقيقة مش هتفتكره لانه للاسف الذاكرة قصيرة المدي محدودة جداً وعندها حد اقصي للمعلومات اللي تقدر تخزنها واي حاجة تانية بتتمسح وبيتم تجاهلها ، ولكن لو ذاكرتنا كلها قصيرة المدي كده مكانش حد عرف يعيش ولا ينجز حاجة ولذلك خُلقت الذاكرة طويلة المدي اللي بيتخزن فيها المعلومات المهمة فعلا اللي هتفيدنا علي المدي الطويل زي خبراتك ودراستك وتجاربك واسمك واسامي العايلة والناس اللي بتحبها وغيرها كتير من الحاجات المهمة ، وده كله بيحصل عن طريق نقل المعلومات اللي بنتعرضلها عن طريق الإشارات العصبية من الحواس للمخ واللي بيقوم بدوره في فلترة وتخزين المعلومات .
طب ما مخنا ماشي كويس لحد دلوقتي ايه اللي بيخلينا نقول عنه انه لا يُثق فيه ؟ لأنه مش بيخزن الذكريات ويسيبها علي حالها زي ما حصلت لأ ده كل فترة بيعدل فيها ويضيف ليها او يشيل منها احداث عشان يناسب الاحداث اللي بتحصل في حياتك والفترة اللي بتمر بيها والغريب ان دي طريقة لحمايتك ولحماية ال ego بتاعك ! مثال :- لو مثلاً مريت بتجربة حب وفشلت هتلاقي انه بعد فترة ممكن مخك يبينلك انه انت كنت مضحي والشخص التاني كان سئ ومستغل وانه الاحسن انكو بعدتو عن بعض فعلاً ” حتي لو الواقع كان غير كده ” ومش بعيد تلاقيه مغير في احداث او مزود في درامتها بحيث يثبت انك صح فعلاً ! كمان مخك بيخليك تفتكر نفسك مؤثر في احداث ومناقشات اكتر ما انت فعلاً كنت مؤثر وطبعا كمية التعديل في الاحداث لصالح الإنسان بتزيد في الناس المغرورة او النرجسية اللي دايماً حاسين أنهم مؤثرين ودايما رأيهم هو الصح ، المخيف انه ذكرياتنا بتتعدل بشكل لاواعي مننا ومش هنقدر ندرك حتي ده غير لما نتكلم مع حد تاني شاف الحدث او الذكري دي مثلاً . من ضمن الامثلة الواضحة علي عدم حيادية الذاكرة هو ما يُعرف بال choice supportive bias وده بيحصل كتير جدا في حياتنا لو مثلاً اتناقشت مع حد اضطر يختار ما بين قررات مصيرية هتلاقيه غالباً بيعظم في قراره اللي خده ويشرحلك اد ايه هو شاكر انه مختارش القرار التاني ويعدلك المزايا والعيوب مع انه ممكن في الواقع يكون القرار التاني احسن لي او الاتنين في نفس المستوي عادي لكن مخنا مش عايز يخلينا في صراع نفسي واحساس بالذنب والندم وكأنه جهاز مناعي نفسي بيحاول يحميك من تأثيرات سلبية كتير ممكن تحصلك فيقرر انه يعدل ذكرياتك بحيث يبين انه القرار التاني كان سئ وانه القرار الحالي اللي اتخذته كان انسب قرار . ده غير ان عدم الحيادية في ذاكرتنا واصل لأبعد الحدود لدرجة بيخلينا نفتكر كلامنا وكلام الناس اللي شبهنا ومن عرقنا وديننا اكتر من الناس المختلفة عننا ، كمان دماغنا بيعمل حاجة لطيفة جدا وهو انه بيمحي المشاعر السلبية المرتبطة بالذكريات السيئة ، ممكن الذكري نفسها تفضل موجودة بس اثرها السلبي غالباً بيمُحي علي عكس الذكريات السعيدة اللي اثرها الإيجابي بيفضل موجود . بس مش معني ان دماغك بيعدل في ذكرياتك انه بيخلق ذكريات جديدة او انه بيعمل واقع مختلف عن اللي انت عيشته يعني مثلا ممكن تفتكر انك كنت مجتهد في دراستك اكتر مما كنت عليه فعلا بس مش هتفتكر انك طلعت الأول وده في الحقيقة محصلش مثلا !
كل التعديلات دي هدفها هو انك تكتسب ثقة في نفسك وتحس بقيمة نفسك واهميتها لأنه الإنسان اللي معندوش ثقة في قرراته وحاسس بانه مالوش اهمية هيعرف يتعايش ويتخذ قررات مصيرية ازاي ؟
الخلاصة من كل ده مش انه متثقش في دماغك وذكرياتك لأنه التعديل مش بيبقي كبير بالدرجة اللي تغير حقايق بس المهم انك تفتكر كويس انك مش بتشوف العالم كما هو عليه ولكن بتشوف العالم و الناس حواليك من نظرتك الخاصة و تجاربك أنت ومعتقداتك ومبادئك وانك لازم تعرف أنه مش كل الناس اللي اختلفت معاهم سيئين بالضرورة ممكن بس متفقتوش او ان كل المجالات اللي قررت متدرسهاش مجالات سيئة ممكن بس مش مناسبة ليك او ان كل النقاشات والجدالات اللي دخلتها في حياتك كنت انت الطرف الصح فيها لانه مش لازم كل الناس تبقي شبهك ومش لازم تكون انت الطرف المضحي المريح المظلوم في كل علاقاتك ممكن تكون متعب في نواحي كتير انت مش مدركها .