التفسير النفسي لبعض الاحلام

كلنا بنحلم كل يوم سواء بنفتكر الاحلام كلها او لأ بس كلنا بتعدي علينا احلام معينة بتعلق معانا وبنبقي مش فاهمين ايه معناها ، مبدأياً احلامنا مصدرها عقلنا الباطن و عقلنا الباطن ده قوة عظيمة ليها تأثير كبير في حياتنا وبيظهر دوره بشكل كبير واحنا نايمين وكأنه بيستبدل دور عقلنا الواعي ، و العقل الباطن لغته عواطف ورموز بس بمعني انه بينبهك لعواطف انت مش واخد بالك منها او متجاهلها في حياتك او لصدمات عاطفية و نفسية واجهتها زمان ولسه مأثرة عليك حالياً بس للاسف مش بيوجهك لده بشكل مباشر لأنه لغتة رمزية وده اللي هنفهمه وازاي فيه رموز في احلامنا وبيبقي معناها ايه في الاحلام الشائعة اللي اغلبنا حلمها في حياته مرة علي الأقل

1- حلم الوقوع من مكان مرتفع

الحلم ده يعتبر اكتر حلم شائع وتفسيره الاقرب في اللي قريته هو ان الشخص ده بيبقي خايف من الفشل في حياته الواقعية او انه عقله الباطن بينبهه ان فيه حاجة غلط بيعملها حالياً في حياته ولازم يعيد تفكير تاني فيها و تفسيرات تانية بتقول انه لو بيقع و هو سعيد ومش خايف فده معناه انه مش خايف من التغييرات اللي بتحصل في حياته ومبسوط بيها ولو الوقوع ده في مياه فغالبا بيقع في حب حد

2- حلم فقدان الأسنان

اول تفسير لي انه الشخص ده بيبقي غالبا مش عنده ثقة في مظهره او عنده قلق وخوف انه يبان مش جذاب وده لأن الأسنان جزء مهم اوي من شكلنا وفقدانها بيأثر بشكل كبير علي مظهرنا و بالتالي العقل الباطن استخدمها كرمز

او انه الشخص ده بيمر بفترة نضج وتطور في حياته وشخصيته و الأسنان بتمر بنفس الشئ ، واحنا صغيرين بنبدل اسنانا بسنان تانية وده بيدل اننا بنكبر وبندخل مرحلة جديدة

او علي حسب كلام فرويد ان الشخص ده بيمر بتغيير جذري في حياته وده لان التوتر والالم اللي بيحصل مع فقدانها بيبقي رمز للتوتر اللي بيحصل مع التغييرات الجذرية اللي بتحصل زي فقدان شخص مهم او الانتقال لبيت جديد او قبول وظيفة جديدة

او كتفسير سلبي شوية انه عقلك بينبهك انه القررات اللي مفروض تاخدها ومأجلها ممكن تؤدي في النهاية لأيه ، لانه الاسنان لو اهملتها برضو هتضطر في الاخر تخلعها

3- الحمل

الحلم ده بيدل علي فكرة او مشروع او خطة بتنمو في حياتك او فكرة لسه بتفكر فيها ومخرجتش للنور وبالتالي الحمل بفتراته بيدل علي مراحل نمو الفكرة بمعني لو الشخص حلم انه في الشهور الاخيرة من الحمل فده بيدل انه الفكرة علي وشك انها تخرج للنور وتغير حياته وتعقيدات الحمل بتبقي رمز لتعقيدات الفكرة بمعني انه لو الحلم فيه حمل في توأم فده بيدل علي انه الحاجة اللي بتكبر في حياته او بيخططلها دي ليها جوانب كتير و صعبة انها تتحقق ولو الحلم فيه ولادة وكانت متعسرة او حصل فقدان لطفل فيها فده تنبيه من العقل الباطن انه ممكن يخسر الحاجة دي لو مفكرش وخطط كويس ليها ولو الحمل ده في كائن غريب ” مش بشري” فده ممكن يبقي معناه ان الفكرة او التغيير اللي هيحصل في حياته غريب ومبهم بالنسباله

او لو فيه ولادة بس من غير الم فدي طمأنة عقلك الباطن ليك انه الحاجة اللي بتخططلها او المشروع ده مش هيبقي بالصعوبة اللي انت قلقان منها

4- حلم المطاردة

غالبا بيدل انه الشخص ده بيهرب من حاجة في حياته الواقعية وخايف يواجهها سواء مشاكل مادية او عائلية او علاقة ، لو الحلم فيه مطاردة من شخص معين فبيبقي الشخص ده فيه رمز للي بيهرب منه لو هو مثلا شخص انتقادي فده بيدل انه بيهرب من انتقادات نفسه لي ” جلد الذات ”

ولو مطاردة من حيوان فمفروض تشوف اول حاجة بتيحي في دماغك لما تفكر في الحيوان ده وبتبقي غالبا هي رمز للحاجة اللي انت خايف تواجهها

لو الحلم حصل في مبني غريب فده مطاردة جوه عقلك بتدل انك بتحس انك خايف تواجه جوانب من شخصيتك حاسس انها مش مألوفة او غريبة عنك

لو الحلم في مكان بره مبني زي صحرا مثلا فممكن تتخيل لو المكان ده له شخصية هيبقي ايه ؟ يعني لو بتحصل المطاردة جوه صحرا فغالبا الرمز ليها انك بتخاف تكون وحيد أو ممل و كئيب

5- حلم الاشباح

لو الحلم هو انك بتُطارد من شبح فده بيدل علي خوفك من المجهول و الحلم ده شائع جداً للاشخاص القلوقين لانهم دايما بيخافو من المستقبل اللي بيبقي بالنسبالهم مجهول ومخيف

لو الحلم انك نفسك بتتحول لشبح فده احساس بالذنب والخوف من حاجة حصلت في الماضي او تعبير عن تعرضك للحزن وفقدان شخص قريب

6- حلم بشخصيات مشهورة

ظهور شخص مشهور في الحلم فده رمز لحاجة انت محتاجها او مفتقداها في حياتك زي جانب من جوانب شخصيته او حاجة هو مشهور بيها او حتي ذكرياتك عنه

اما لو حلمت انك نفسك بقيت مشهور فده ممكن يبقي تفسيره العكس تماما وهو انك حاسس انك محتاج تقدير و معرفة الناس اللي حواليك بيك

لو الحلم بشخص مشهور بتحبه جدا فده بيدل انك عايز يبقي عندك صفات من الشخص ده او التفسير. السئ انك ممكن تكون شخص حسود في الحقيقة او حاسس انك عايز يبقي عندك اللي عند الناس التانية و احساس ان اللي عندك مش كافي

7- حلم الامتحان

ده تقريبا اكتر حلم بيتكرر عند الناس كلها بالذات قبل أحداث مهمة في حياتهم او قبل قبول وظيفة جديدة او قبل حدث مهم في شغلهم ، وده لأن المدرسة كانت اول تجربة شغل مصغرة في حياتنا والامتحانات كانت اول مصدر توتر قابلناه في حياتنا عشان كده بتبقي دايما رمز لكل مخاوفنا بعد كده ، الحلم بيدل علي خوفك من الفشل ، كمان الامتحان عبارة عن تجربة بنتحط فيها عشان نواجه نواقص في شغلنا او مذاكرتنا وده اللي بيخليه يتكرر قبل اي حدث حاسين اننا مش مجهزين لي كفاية او خايفين اننا نفشل فيه وتبان نواقصنا دي

8- حلم الموت

سواء حلم موت الشخص نفسه او حد عزيز عليه فبيدل علي حاجات كتير منها الخوف والقلق من التغيير وده لان زي الموت ماهو تغيير كبير و الجانب التاني منه مخيف بالنسبة لأغلب الناس فالتغيير بيُرمز لي بالموت

من ضمن معناياه برضو انه فيه تغيير كبير حصل في شخصيتك وانك بتفتقد صفة اتغيرت فيك * ماتت بالنسبة لعقلك الباطن* بسبب ظروف اتحطيت فيها ، فلو حلمت ان شخص عايش عادي في الحياه الواقعية مات في الحلم دور عن الرمز اللي بيمثله الشخص ده والصفة اللي بيملكها وانت افتقدتها

طبيعة الموت بترمز لطبيعة. التغيير اللي حصل بمعني لو الموت كان طبيعي وغير مؤلم فبيدل أن الصفة اتغيرت طبيعي مع الزمن لكن لو حادثة قتل عنيفة فده بيدل انه حصل تروما وتغيير مفاجئ

9- حلم فقدان الموبايل

يمكن هو مش شائع زي الباقي بس هو حلم اتكرر معايا فحبيت اعرف تفسير لي

اول تفسير لي هو ان الموبايل بقي يرمز في عصرنا للتواصل واننا تقريبا من غيره بنبقي شبه معزولين عن الناس ففقدانه في الحلم بيرمز ان الشخص ده بيحس انه معزول ووحيد في حياته في الفترة دي او انه عنده مشكلة في التواصل مع الناس وبالتالي بيبقي معزول عنهم

او ممكن يكون الحلم لشخص معين حاسس انك فقدت التواصل معاه سواء فعليا او علي مستوي اعمق فانك بتتكلم معاه ومش عارف فعلا تتواصل بشكل حقيقي

او ممكن يبقي معناه انك حاسس انك مش عارف تعبر عن مشاعرك الحقيقية ومخاوفك للناس حواليك

10- حلم الزواج من شخص غريب

الزواج في الحلم ممكن يرمز لحاجات كتير وبيختلف علي حسب شخصية كل واحد ونظرته للجواز ممكن يبقي حلم لحد وممكن لحد تاني يبقي سجن لكن الاكيد انه الزواج من شخص غريب عمرنا ما عرفناه ده كابوس لأي حد فعشان كده الجواز في الحلم ده هيرمز لمشكلة طويلة الامد واحساس انك محبوس جواها ومش عارف تخرج منها .

اخر حاجة هو ان كل الاحلام دي في الاخر بتعتمد علي الرموز و الرموز بتختلف من شخص للتاني علي حسب شخصيته وبيئته وعوامل تانية كتير فالفكرة هو ان كل حلم نحلمه نفكر فيه كويس ونحاول نفهم عقلنا عايز يقول ايه عشان نفهم المرحلة اللي بنمر فيها لأن عقلنا الواعي من كتر زحمة الحياه والاحداث اللي بتحصل مش بيبقي واعي لمشاعرنا والحاجات العميقة دي اللي بينتبه ليها عقلنا اللاوعي .