أرشيف التصنيف:علوم

كوكب الارض هو حتماً كوكب مثالي بالنسبة لأي كوكب حواليه فهو الوحيد اللي اتوفرت فيه كل عناصر الحياه والوحيد اللي موقعه مثالي بالنسبة للشمس فلو كان اقرب من موقعه ده شوية أو ابعد شوية مكانش هيبقي فيه حياه ابداً وهيبقي زيه زي كواكب المجموعة الشمسية التانية الخالية من الحياه ، فهو قد يبدو لينا مثالي وآمن من كل النواحي بس هل هو كده فعلاً ؟
الحقيقة أنه لأ ، الكوكب ده مر عليه كوراث تخليك تتعجب ازاي قدر يكمل بعدها ويحتوي حياه تاني بل ويحتوي كل مرة كائنات اعقد من اللي انقرضت ! وكأنه بينهي دورة حياه عشان يوفر ظروف اخري مناسبة لحياه تانية أهم واعقد ! فتعالي معايا نشوف ايه هي اهم الكوراث اللي مرت علي كوكبنا المثالي ايام لما كان مش مثال خالص 😀

1- the thea impact
دي كانت أقدم كارثة مرت علي الأرض ، كانت من ٤ مليار سنة في نفس الوقت اللي الأرض نفسها اتكونت فيه ، الارض اتكونت زي كل الكواكب الصخرية من مجموعة صخور اتجمعت بفعل الجاذبية وكونت كوكب الأرض اللي وقتها كان عمال يتلقي ضربات من صخور ومذنبات من كل ناحية وكان نتيجة لده سطحه درجة حرارته عالية جداً لدرجة الانصهار ولكن الصخور والمذنبات اللي عمالة تضربه دي كبرت حجم الكوكب وساهمت في تكوينه ، ولما الكوكب خلاص بدأ يشق طريقه للحياه راحت حصلت الكارثة ! كوكب اسمه ثيا اصطدم بالأرض وكان حجمه عشر اضعاف الارض ! واللي طبعاً شقلب الحياه تماماً عليها وفي الاخر الكوكبين اندمجو مع بعض واتجمع حواليهم حطام الكارثة دي اللي كون زي حلقة حوالين الأرض واللي مع الوقت اتشكلت للقمر ! واللي لولا وجوده مكانش هيبقي فيه حياه علي الأرض لأنه بيحميها من تأثيرات جاذبية الكواكب حواليها واللي كانت هتغير من محور دورانها حوالين نفسها بمعني انها هتدور بميل حوالين نفسها كبير جداً واللي مع الوقت هيخلي المناطق الاستوائية تبقي مكان القطبية وبالتالي انقراض لأي حياه هتتكون في المناطق الاستوائية !
2- shower of asteroids
بعد حوالي 150 مليون سنة من الحدث الأول ولما بدأت الارض تشم نفسها شوية وتشق طريقها للحياه تاني والبعض بيقول انه كان فيه محيطات وبدايات لحياه علي الأرض كمان حصلت كارثة جديدة سببها هي الكواكب الغازية * المشتري وزحل و أورانوس ونبتون * اللي كانت مدراتهم متقلبة وقتها فطردوا من حواليهم المذنبات ( اللي هي صخور محلفهاش الحظ فأنها تكون كوكب )والمذنبات دي فضلت تصطدم بالأرض و كانت كبيرة جداً توصل لحجم محيطات ! فتخيل بقي انها فضلت تصطدم بالأرض لمدة ٢٠٠ مليون سنة ! والدليل علي وجودها سطح القمر اللي مليان فوهات وحفر علي عكس الأرض اللي حركتها المستمرة غطت علي اثار الكارثة دي ، و الاصطدامات دي مكانتش هباءاً بل هي مدت الارض بعناصر ومعادن مكانتش موجودة فيها زي الدهب والبلاتين والفضة .
3- snow ball earth
اكيد شوفنا قبل كده في التلفزيون والنت شكل القطب الشمالي والجنوبي وسمعنا عن مدي برودتهم لدرجة أنهم مش مأهولين بالسكان تقريباً ومفيش إنسان يتحمل حرارتهم دي بسهولة ابداً فتخيل لو كانت الارض كلها كده ! ده بالظبط اللي حصل من ٢.٤ مليار سنة أن الارض كلها اتجمدت بكل منطقة ومحيط فيها ، وبما أن الجليد ده بيعكس اشعة الشمس عن الأرض ودي اهمية القطبين حالياً فانهم بيقللو من درجة حرارة الارض وتأثير الشمس علينا بس وقتها الارض كلها كانت متجمدة بالتالي كانت بتعكس اشعة الشمس دي تماماً وبتزداد برودة اكتر واكتر ويزيد الجفاف وانعدام الحياه طبعاً ، طب ايه سبب كل ده ؟ سبب انعدام الحياه وقتها هي الحياه نفسها ! بداية الحياه علي الارض كانت لكائنات بسيطة خالص وهي البكتيريا واللي كانت بتعتمد علي غاز الميثان و اللي كان لي اهمية كبيرة تانية تتمثل في كونه بيحافظ علي درجة حرارة الارض وبيخليها دافية في نفس الوقت ده ابتدا يظهر نوع جديد من الميكروبات المائية واللي عملت لاول مرة في تاريخ الارض بناء ضوئي عن طريق انها تمتص ثاني أكسيد الكربون وتطلع اكسجين واللي وقتها كان غاز سام ! لانه ببساطة مالوش لازمة ! ومفيش كائن موجود وقتها بيستهلكه و مع ذلك كان بينتشر بكميات كبيرة خلت انظمة الحياه تختلف تماماً وتحصل الكارثة بأن الميثان يتأكسد وبالتالي البكتيريا تموت وتختفي الحياه الوحيدة اللي كانت موجودة والكارثة التانية الأكبر انه الميثان اللي بيدي الأرض دفئها ميبقاش موجود فتتجمد الأرض كلها ، طب ايه خلي الأرض ترجع تاني من الكارثة دي ؟ تحت سطح الارض لب منصهر وبراكين فتخيل انك جبت كتلة تلج كبيرة بس تحتيها مولع نار هيحصل ايه ؟ حصل تصدعات في طبقات الجليد دي ومع الوقت انصهر ورجعت الأرض اقوي من الأول !
4- the ordovician extinction
من 450 مليون سنة حصل انقراض لحوالي 90% من أشكال الحياه علي الأرض ، البعض فسر ده بأنه نتيجة تغير حراري مفاجئ والبعض فسره بأنه حدث من الفضاء الخارجي زي أشعة جاما اللي بتنتج عن انفجار نجم والطاقة من الاشعة دي كبيرة جداً وكافية انها تنهي الحياه علي الأرض ! تالت تفسير هو ظاهرة ال bow shock واللي ابسط مثال ليها هو السفينة اللي لما بتمشي وسط البحر هتلاقيها عاملة موجات حواليها الموجات دي واخدة شكل السفينة نفسها واللي لو افترضنا ان مركب صغيرة ماشية جنب السفينة بالظبط واصطدمت بالموجات دي فهتتعرض لطاقة كبيرة جداً تكفي لتغريقها ده بالظبط اللي بيحصل في الفضاء لو بدل السفينة المجرة بتاعتنا وبدل الموجات الاشعة الكونية وبدل المركب الصغيرة الأرض بتاعتنا اللي بتتأذي من الاشعة الكونية دي كل ٦٢ مليون سنة تقريبا لما تدور بالقرب من مسار الأشعة الكونية دي ! وبالرغم من موت انواع كتير جداً الا ان موتهم اتاح للانواع المتبقية اللي قدرت تتغلب علي الظروف الصعبة دي فرصة تنوع اكتر و ظهرت انواع اقوي .
5- the great dying
من 250 مليون سنة حصل نفس الانقراض الجماعي ده تاني بأن انقرض 90٪ من الكائنات ! وده تفسيره انه حصل بركان من تصدعات في الارض في سيبريا وامتدت التصدعات دي لمسافة كبيرة وفضل البركان ده نشط لمليون سنة كاملة ! واللي الأزمة مش في الحمم اللي بيطلعها بس ولكن في الامطار الحمضية والغازات السامة اللي طلعها واللي سببت الانقراض الجماعي ده !
6- the dinasours extinction
من 65 مليون سنة كانت بتعيش اكتر كائنات مبهرة لينا حالياً واللي كانت ضخمة جداً ومهيمنة علي الأرض لمدة 200 مليون سنة ! لحد ما فجأه انقرضت كلها ، وده سبب لغز كبير لعلماء عصرنا لحد ما اجمعوا علي نظرية هي أنه في نفس وقت انقراضها سقطت صخرة كبيرة جداً بحجم جبل اڤرست جنب المكسيك حالياً واللي سببت فوهة كبيرة جداً موجودة لحد دلوقتي تحت المياه هناك ودي مكانتش الأزمة الوحيدة ، الازمة الحقيقية هي العواقب بتاعتها وهي انها هبوطها علي الارض سبب حاجز من الغازات والأتربة منع ضوء الشمس عن الأرض وخلاها في حالة ظلام كامل ده غير الامطار الحمضية اللي نتجت عن براكين كانت بتثور في الوقت ده كتير واللي زودت الحال سوءاً وخلت الديناصورات تنقرض ببطئ واللي موتها برضو كان مهم لانه سمح للثدييات انها تزدهر واللي بيجي على رأسها احنا !

لو فكرت في كل الاحداث دي هتلاقي أن لولاها مكانش هيبقي فيه ظروف مهيأه لوجود كائنات معقدة زينا وكأن ربنا كان بيهيأ الأرض لوجودنا عليها من اول ما القمر اتكون في اول كارثة و ظهور المعادن المهمة اللي كونت لُب الأرض في تاني كارثة او ظهور الأكسجين اللي سبب تجمد الأرض في البداية و تنوع الكائنات اللي نتج بعد الانقراض في العصر الاردوفيشي و انقراض الديناصورات اللي عمرنا ما كنا هنعرف نعيش ونهيمن علي الأرض في وجودها .

لسه فاكر أن الحياه علي الأرض امان ؟