أرشيف التصنيف:علم نفس

خلينا متفقين أن الإنسان غريب وبيعمل برضو حاجات غريبة وغبية احياناً فهل الحب من ضمنها ؟ وهل هو خداع فعلاً ومجرد هرمونات وغريزة بتقودنا عشان نتجوز ونخلف ونحافظ علي استمرارية النوع ولا هو حاجة اعمق من كده وتستاهل الضجة اللي عملها عليه الشعراء والقصص والملحميات والاغاني ؟

• الأول خلينا نتكلم عن ال mechanism of love وايه اللي بيحصلك لما بتحب حد

اول حاجة هتلاحظها لما تحب حد هي انك بتبقي مرتبك و بتقول كلام غريب وبتتصرف بشكل غريب وغبي احياناً لما تكون معاه ده غير نبضات قلبك اللي بتزيد لما تشوف الحد ده وده اللي خلي الناس مؤمنة لعصور أن القلب هو المتحكم في الحب مش العقل ، التفسير لارتباكك وشقلبة حالك دي هي كميا وهرمونات جسمك اللي بتتغير علي تلات مراحل ، اول مرحلة هي ” lust” ودي اكتر مرحلة بدائية في الحب ودافعها غريزة الإنسان انه يتجوز ويخلف وينقل چيناته دي زي كل مخلوقات ربنا ، الهرمونات المحفزة للمرحلة دي هم الاستروجين والتستوستيرون وخاصة التستوستيرون ” اللي موجود في البنات برضو عادي” ، تاني مرحلة هي ال ” attraction” دي مرحلة مهمة واللي متحكم فيها ال Dopamine وال norepinephrine ودول هيخلوك مليان طاقة وحب وسعادة لدرجة انك ممكن متنامش ولا تاكل كويس وده بينشط عندنا حاجة اسمها reward pathway وده بينشط لما نعمل حاجة بنحبها بالذات منطقة اسمها “caudate nucleus ” واللي لاحظوا فيها نشاط عالي جداً في الناس اللي بتحب لما عرضوا عليهم صور الحد اللي بيحبوه ، وكمان المرحلة دي بيقل فيها ال serotonin اللي بيتحكم في شهيتنا ومودنا العام واللي لاحظوا انه قليل في مرضي الوسواس القهري برضو ، وده خلي العلماء يفسروا الهوس بالطرف الاخر اللي بيحصل في بداية العلاقة بقلة نسبة ال serotonin ، تالت مرحلة هي ال ” attachment ” واللي بتبقي مهمة جداً في العلاقات طويلة الامد والصداقات والهرمونات المسئولة عنها هي ال oxytocin وال vasopressin ، ال Oxytocin بالذات معروف بأنه هرمون الحب وهو هرمون مش مهم في الحب بس لكن في فكرة الارتباط والعلاقات وال bonding عامة والدليل علي كده انه بيتفرز في فترة الحمل وفي الرضاعة بكميات كبيرة عشان يساعد علي تكوين رابط قوي بين الأم وطفلها .

• اتكلمنا عن ال mechanism طب ايه هي تأثيرات الكميا والهرمونات دي عليك وبتخليك تعمل ايه لما تحب حد ؟

هتخليك حرفياً عامل مركز جديد لعالمك وهو الشخص اللي بتحبه سواء بوعيك او لأ وهتبقي مركز اهتمامك علي الشخص ده لدرجة ممكن تنسي العالم والاشخاص من حواليك ” بدون قصد ” ده غير طبعا العاطفة الكبيرة ناحية الشخص المعين ده ، ده غير ان الحب فعلا ً بيديك طاقة كبيرة انك تعمل اي حاجة وبتحس انك ممكن تطير وتلف العالم وتحقق كل حاجة لمجرد وجودك مع الشخص اللي بتحبه ده غير انك هتمر ب mood swings فمثلاً لو الشخص اللي بتحبه موجود عشانك ومديك اهتمام وانت وهو سمنة علي عسل هتبقي الدنيا بمبي والحياه بقي ليها لون تاني فعلاً بس لو الشخص ده غاب عنك او اتخانقتو او بتمروا بظروف صعبة فعلاً ممكن توصل لاعماق اليأس والحزن وتتحول الدنيا سواد عندك ، وكمان بيخليك عايز ان الشخص ده يبقي متعلق بيك بنفس مستوي تعلقك بيه وكمان بيخليك حساس جداً للشخص ده وكلماته ليك وبتقعد تتدور كمان عن معاني مخفية لكلامه واسلوبه معاك ، الحب في الجانب المظلم شوية لي ممكن يخليك تغير مبادئك وقيمك واسلوب حياتك واختياراتك واسلوب لبسك ومعيشتك وممكن المدينة اللي عايش فيها او الكارير بتاعك في سبيل انك تكون مع الشخص اللي بتحبه او حتي عشان ترضيه بس ، بتبقي كمان معتمد عاطفياً علي الحد ده ومش قادر تنفصل عنه و بتحس كمان بالسعادة لما يكون سعيد وبتحس بالحزن لما يكون حزين ! كمان علي مر التاريخ اكتشفوا علاقة غريبة ما بين الصعوبات والظروف المستحيلة والحب ! وأنه المحن والصعوبات دي بتزود من حبهم لبعض ، الصعوبات دي ممكن تبدأ من الخلافات العادية والانفصال عن بعض لفترة لغاية الصعوبات الكبيرة زي كونهم من اعراق مختلفة او حبهم مرفوض اجتماعيا او من مستويات اجتماعية مختلفة . وكمان الحب بيخليك عندك امل دايما ً بالذات لو بتمروا بصعوبات ومشاكل هيبقي عندك أمل ان كل ده يتحل حتي لو الواقع غير كده . المؤكد كمان في كل ده أن الحب مش ثابت بالعكس هو عواطف ومشاعر كتير متقلبة ومتغيرة ، ممكن في يوم تحس انك في اعلي درجات الحب والعشق وفي يوم تاني تحس باشد لحظات اليأس ، ممكن في يوم حلو قضيتوه سوا تبقي في منتهي السعادة بس بعدها بيوم لو نسي يكلمك تبقي في حالة خذلان وحزن ، وده بيفكرني باقتباس قريته ” to love someone is to make a tough decision everyday to choose him over and over again ”

• الحب مش مخصص بس للإنسان

الحيوانات برضو بتحب ! وبتمر بمشاعر كتير مشابهة للي بيمر بيه الإنسان من تملك وغيرة ورغبة في حماية اللي بتحبه والمثابرة للوصول لفرد معين مش أي حد وخلاص ومنها انواع كتير خاصة الطيور ممكن تعيش مع شريك واحد طول حياتها ، طب ايه خلي الحب عندنا واضح كده عنهم ؟ انك ببساطة اذكي منهم ! الإنسان اذكي مخلوق بدون خلاف واكتر كائن بيعرف يعبر ويتواصل ” we are the most impressive creatures with no doughts ! ” انت عندك مخ اكبر بالتحديد فص امامي اكبر ” المسئول عن التفكير” وبالتالي انت عندك قدرة علي التفكير في الشخص اللي بتحبه ده اكتر بكتير ، كمان عندك اميجدالا اكبر ودي المسئولة عن العاطفة وعن تخزين الذكريات العاطفية وبالتالي عندك قدرة اعلي في انك تتعامل مع مشاعرك و تفتكرها وتخزنها ، وكمان عندك caudate nucleus اكبر ودي اللي قولنا أنها الجزء اللي بينشط جداً لما تحب حد ، وبالتالي انت اكتر كائن محظوظ لأنك بتختبر الحب بكل تفاصيله وبتعرف تعبر عنه علي عكس باقي الكائنات !

• طب تفتكر ليه بنختار شخص بعينه ونقدمله كل الجنون والحب ده ؟

الاول نفهم انه الأسباب والعوامل دي نظريات مش معايير بحطها .

1- اول عامل مؤثر هو الوقت زي ما بيقولو كتير انك هتحب في اكتر وقت انت مش متوقع انك تحب فيه طب ايه السبب في ده ؟ لو انت لسه منتقل لمدينة او بلد جديدة عليك او لسه خارج من علاقة سيئة او لسه مغير كاريرك او عندك ازمة في حياتك حالياً او عندك وقت فراغ كبير جداً فمبروك عليك انت في اكتر وقت معرض فيه انك تحب 😀 لأنه الناس اللي بتبقي متوترة او بتمر بتجارب جديدة وعايشة في stress طول الوقت او عامة emotionally triggered بتبقي عندها نسبة دوبامين عالية ” مش بييقي عالي في الحب بس ” عشان كده بتبقي مُعرضة وvulneraable جداً انها تحب حد في الوقت ده . ده غير انك لو نفسك اوي ترتبط عامة في الوقت ده هيخليك عرضة طبعا انك تحب وللأسف ممكن يكون الحد الغلط ليك ومتدركش ده غير متأخر .

2- الغموض ، النوعين بيلاقوا الغموض جذاب ليهم والعكس صحيح لو شخص مألوف أوي بالنسبالك غالباً مش هتحبه زي شخص اتربي معاك مثلا فانت كده كده عارف عنه كل حاجة فمفيش حاجة جديدة هتجذبك وتشدك لي فغالبا هتبص بره الصندوق . حتي الحيوانات لاقوا فيها الانجذاب للغرباء عنهم اكتر من اللي عايشين واتربوا حواليهم ويمكن دي حاجة فطرية فينا عشان يحصل تنوع چيني و ميحصلش امراض وراثية كتير من جواز القرايب مثلاً . فاحنا عندنا قابلية كبيرة جدا ً اننا نحب الناس الغامضة والجديدة بالنسبة لنا وده بيزود لوحده كمية الدوبامين عندك .

• اكيد قابلك كتير ناس بتقول ان الناس اللي عكس بعض بتنجذب لبعض فهل ده حقيقي ؟

الإجابة اه بس بشروط بمعني ان اغلب الناس بتنجذب لناس مختلفة عنها في الشخصية وبعيدة عن حدود قرايبهم والناس اللي اتربوا معاهم بس متفقين في الدين مثلاً والعرق والحالة الاجتماعية ونفس الخلفية الاجتماعية والمادية وغالباً نفس مستوي الجمال والذكاء ونفس اسلوبهم وقيمهم واهتماماتهم و مهاراتهم الاجتماعية . واغلب الناس بالفعل بيبقو مدركين النوع اللي بيفضلوه وبيدورو عنه ، وبما ان تفضيلاتك الشخصية وشغلك واللي بتعمله وقت فراغك بيتحددوا غالباً بالچينات وبالتالي الچينات بتلعب دور كبير اوي في الحب و غالباً الناس بتنجذب لناس بتحمل چينات شبهم ” مش قرايبهم بالضرورة ” . بس طبعاً الحب والعلاقات مالهاش كتالوج والناس عادي ممكن تنجذب لناس من عرق او دين او بلد مختلفة عنهم تماماً او يحبوا حد من قرايبهم عادي بس غالباً والاقوي احتمالاً انك تنجذب لحد بعيد عن الدايرة اللي اتربيت وعيشت فيها وعكسك في صفاتك الشخصية بس متفق معاك في دينك وعرقك وبلدك و الي اخره .

3- الجمال الخارجي واللي علماء كتير اتفقو انه بيعتمد علي مدي تشابه وتناسق ملامحك وجسمك وده بنتشابه فيه مع الحيوانات اللي برضو كتير منها بينجذب للي اجزاء جسمهم متناسقة زي انثي العقرب مثلاً اللي بتدور عن ذكر متناسق في الاجنحة بتاعته والقرود بتدور عن اللي عندهم اسنان متناسقة ، و ده يعتبر فطرة فينا اننا ندور عن الناس اللي ملامحهم واجسامهم متناسقة لأن تناسق الملامح والجسم بيدل ان عندهم جهاز مناعي قوي وعندهم چينات مميزة وبالتالي التزواج معاهم هيبقي مفيد لبقاء نوعك 😀 ، وهنلاحظ انه الناس دايما بتسعي ” خاصة البنات ” انه جسمها وملامحها تبقي متناسقة فبتحط ميكب وبتلبس لبس معين وبتمشي علي انظمة غذائية وبتعمل عمليات تجميل كمان عشان توصل للتناسق ده . ده غير انه فطرياً الموضوع بيحصل في مرحلة التبويض عند البنات بحيث تبقي متناسقة وجذابة اكتر .

4- حقيقة تانية مش غريبة عننا وهي أن الولاد بتميل للبنات الاصغر واللي بتظهر عليهم علامات الشباب والجمال اكتر و guess what ? دي فطرة برضو لأنه لو هي healthy و energetic وحلوة بالتالي هتخلف ولاد صحتهم كويسة و شكلهم حلو ، ده غير انه فعلاً بعض التجارب اثبتت انه المناطق في الدماغ المسئولة عن معالجة المؤثرات البصرية عند الولاد بتبقي انشط كتير من اللي عند البنات بالذات الوش وبالتالي ممكن نستتنج أنه الولد هينجذب للشكل اسرع ولتناسق الجسم طبعاً وبالتالي هيبقي الاسرع في الوقوع في الحب . حاجة تانية مهمة جداً للولد هو انه بطبعه بيحب يحمي ويساعد اللي بيحبها وبالتالي هيحب ينقي واحدة محتاجة مساعدته فعلا ومحتاجاه يحل مشاكلها وده لان الولاد بطبعهم بسبب تأثير التستوستيرون “problem solvers” وبيحبو كمان في كل الانواع وعلي مر التاريخ انهم يحمو وينقذو ويوفروا الحماية لاسرتهم ، وحبهم لمساعدة البنت اللي بيحبوها دي ممكن يخليهم يكنسلوا مشاكل لصحابهم او اهلهم عشانها وده بيدل علي عدم انانيتهم في العلاقة علي عكس البنات اللي بتبقي مكونة روابط قوية مع اهلها وصحابها ومش بتتخلي عنهم بسهولة وده ميزة برضو عند البنات انها بتكون روابط اقوي و اعمق مع الناس حواليها . بالنسبة للبنات فلما اجروا تجارب عليها لاقوا انهم لما يشوفوا الشخص اللي بيحبوه بتنشط مناطق في المخ مسئولة عن معالجة العواطف ومناطق مسئولة عن الذاكرة وتخزين الذكريات و السبب المحتمل لكده انه الولد بيختار باللاوعي غالبا البنت اللي هتقدر تخلف وتربي ولاد وچيناتها تكون كويسة وده كله ممكن يعرفه just by looking وعشان كده سهل جداً يقع في الحب من اول نظرة لكن البنت باللاوعي غالبا برضو محتاجة حد يبقي قادر يحميها ويبقي مسئول وده مش هتقدر تعرفه بالنظر بس وبالتالي هي محتاجة تفكر الاول وتقيم بنفسها بناءاً علي الذكريات والمواقف اللي حصلت ، كده نقدر نقول انه ” men can see better than they can think ” علي عكس البنات . فرق كبير تاني ما بين الولاد والبنات ان البنات واقعية في الحب عن الولاد حتي لو مش مدركة ، ده ازاي ؟ البنات بتميل بالاكتر للولاد اللي ليهم مكانة اجتماعية اعلي وحالة مادية احسن وناجحين في شغلهم ومسئولين وطموحين وقادرين يحققوا مكانة في المجتمع عامة وده باللاوعي برضو شوية لانها محتاجة حد يكون مسئول وقادر يكون أسرة ، وده اكتسبناه في چيناتنا من الستات زمان اللي اكيد كانت بتعاني لما تختار الشخص المناسب ليها ، كمان البنات بتفضل الولاد الواثقين من نفسهم وواثقين من خططهم المستقبلية و الاذكياء ، والولاد سواء بوعي منهم او فطرة غالباً مدركين ده وبيسعو دايما انهم يثبتوه للنوع الاخر ، من الصفات الشكلية اللي البنات بتفضلها الطول والفك السفلي القوي والعريض وده لاسباب من اللاوعي برضو 😀 لانه الصفتين بيدلو علي نسبة تستوستيرون عالية بالذات الفك القوي ده غير ان الطوال بيدو انطباع انهم هيبقو protective اكتر . ونقطة مهمة تانية ومعروفة ان البنات بتحب the funny one وده برضو لي سبب وهو انه الشخص ال funny بيبقي عنده ذكاء عالي غالباً ، والصفات دي مكتسبة في چيناتنا بمعني ؟ انه اجدادنا والناس اللي قبلينا عامة اكتسبو الخبرات دي وورثوها لينا فبقينا باللاوعي بتاعنا بنختار بنفس الطريقة البدائية اللي كانو بيختارو بيها واكيد دي مش معايير قاطعة وصحيحة كلها .

• طب ايه هي العوامل الشخصية لكل واحد ؟

الموضوع بيبدأ من اول ما بنتولد بداية من اهلك وطباعهم والمكان اللي اتربيت فيه و الظروف اللي مريت بيها والحاجات اللي كنت بتحبها من صغرك لحد ما كبرت والافلام والروايات والمسلسلات والكتب اللي بتحبها والمدراس اللي دخلتها وتفضيلاتك لبعض المواد كل ده هيعملك unique person with a unique chart ومع بداية نضجك وبحثك عن شريك حياه هتدور عن حد مناسب لكل اللي انت مريت بيه ده ، وده حتي بيختلف علي حسب انت عايز ايه ازاي ؟ هل انت عايز حد يتفق مع اللي بتقوله واللي انت شايفه ؟ ولا عايز حد يناقشك ويختلف معاك ؟ عايز حد سهل تتنبأ بافعاله ؟ ولا حد غامض ؟ عايز حد يسليك ؟ ولا عايز حد يشجع ويزود افكارك عن الحياه ؟ فيه ناس عايزة حد يبقي لي نفس الlife style بتاعهم وفيه ناس عايزة حد لي الlife style اللي نفسها توصله ، فيه ناس عايزة حد مختلف معاها فكرياً وشخصياً عشان يفتح ليها آفاق جديدة وفيه عايز حد متفق معاه ومريحه ، شوفت الحوار معقد أزاي؟ علماء نفسيين كتير حاولو يفسرو الحب بطرق تانية برضو زي انه فيه ناس كتير هتحب شخص شبه حد من اهلهم عملهم trauma في حياتهم ” سواء الاب او الام ” وده باللاوعي برضو يمكن لاننا عايزين نوصل لحل او closure للtrauma دي . نظرية تانية هو اننا بنميل للاشخاص اللي اتعرضو لنفس الchildhood Traumas اللي مرينا بيها يمكن لانهم هيفهموا معاناتنا اكتر . فيه نظرية كمان غريبة بتقول اننا بنكون علاقة شبيهة بعلاقتنا مع امنا بما انها اول علاقة بنشوفها في حياتنا فلأما هتبقي secure لاما هتبقي علاقة مش مستقرة ومليانة قلق علي حسب اللي كل حد مر بيه . ده غير انه الناس بتميل غالباً للاشخاص اللي بتكملها او اللي عندهم صفات مفتقدينها ونفسهم يبقي عندهم الصفات دي .

Fun theory



هي ان كل مواهب الإنسان دي من ذكاء عام وذكاء لغوي و فن وموسيقي وشعر وروايات وهندسة وتمثيل وكل المواهب اللي الإنسان وصل ليها هي كانت في الأساس عشان تقدر تكسب شريك حياه ! لانه ببساطة موهبتك الموسيقية او الفنية او العلمية بتجذب ناس معينة ليك علي حسب تفضيلاتهم الشخصية وبالتالي بتنجح في حياتك العاطفية اكتر ! وعشان كده هتلاقي الناس بتحقق نجاحات في حياتها في فترة النضوج والشباب في الغالب قبل سن ال ٣٥ عشان ده اكتر وقت بنبقي بنسعي فيه للحصول علي شريك حياه

تخيلت مدي تعقيد الحب ؟

تخيل انك هتعرف حد بكل تجاربك من اول ما تولدت لحد سنك ده + تفضيلاتك الشخصية + اللاوعي وعمايله + الوقت نفسه اللي قابلت فيه الحد ده + كل المشاكل وال trauma اللي مريت بيها + چيناتك + نفس العوامل للشخص التاني

I think it’s a miracle to find someone to love in all theses complex processes that have to happen and yet people fall in love every moment ! So I believe that one of the greatest things god creates is our ability to love !

اغلبنا اتعرض للعنصرية بشكل او بآخر في حياته سواء عشان نوعه او بلده او دينه او حتي عرقه . ولو فتحت الأخبار هتلاقي أنه حوادث العنصرية في كل مكان وبتوصل في اسوأ احوالها للقتل وللحروب كمان . الموضوع مش مشكلة عصرنا علي اد ما هو مشكلة الإنسان في كل العصور تقريباً ، لو قريت في التاريخ هنلاقي انه كتير جداً من الحروب والصراعات كانت في أساسها بسبب العنصرية . فنقدر نستتنج من ده أن العنصرية متأصلة فينا و جزء من طباعنا فياتري ليه الإنسان بيحب يبقي عنصري ؟ 

الأول خلينا نقول الحقائق وهي أن الإنسان بيحب دايماً يكون جزء من مجموعة وبيكره الوحدة وده بيظهر في حالتين اتعمل عليهم ابحاث ، اول حالة أنهم لاقو إن الأطفال في أوقات كتير بتعيط بدون سبب عشان بس تلفت انتباه اهلها ويتواجدو حواليهم وميكونوش لوحدهم ، تاني حالة هي السجن الانفرادي اللي بيعتبر من اقوي اساليب التعذيب النفسي . فحب الإنسان القوي لوجوده وسط مجموعة بيأثر حتي علي منطقه وتفكيره السليم في سبيل أنه يكون مش لوحده ووسط مجموعة من الناس والمثال البسيط لده انه ممكن صحابك كلهم يبقو بيحبو فيلم معين او اغنية وانت بتكرهها بس بتقرر تخالف اللي انت شايفه ده ” في الغالب ” عشان تقدر تتوافق وتتماشي معاهم وده كمان لي تفسير تاني وهو أن الإنسان دايما بيسعي لاستحسان وحب الناس لي ، فوجود العوامل دي بيخلي الإنسان يعمل حاجات غير منطقية وحاجات يمكن مش هيعملها لو كان لوحده وده عشان يحافظ علي وجوده وسط المجموعة دي ويحافظ علي وجودها زي أنه يحارب اي مجموعة تانية مختلفة معاه او أنه يشوف أي حد مش في مجموعته دي حد أقل منه او حد حتي مش إنسان وممكن يستعبده . فوجودك وسط مجموعة بيخليك تتبني افكار ومعتقدات ومبادئ مكنتش هتتبناها لو لوحدك وكمان تحارب عشانها . فيمكن ده يخليك تقف شوية وتتساءل هل أفكارك ومبادئك دي انت فعلا مختارها ومؤمن بيها ولا بس عشان أنت جزء من مجموعة ؟ وهل وجودك وسط مجموعة بيحتم عليك تقلل من اي حد مش معاك فيها ؟ 

الاحلام حاجة مشتركة ما بين كل الناس تقريباً وبتحصل بشكل يومي في نومنا منها المزعج والغريب والخيالي واللي بيخلينا مبسوطين لما بنصحي واللي العكس بيخلينا متضايقين . وعلي مر التاريخ كان استجابة الناس للأحلام مختلفة و كان ليها دور كبير في حياتهم فمثلاً في بداية تاريخ الإنسان بدأت فكرت ألهوية الموتي او البعث بالأحلام ده ازاي ؟ كان حد عزيز عليه بيموت فينام يحلم بيه وطبعاً لأنه مش مدرك يعني ايه حلم كان بيفتكر انه الشخص ده لسه عايش وانه هيرجع يُبعث تاني ومن هنا بدأت الفكرة وكانت موجودة في حضارات كتير زي الحضارة المصرية . ده غير أن الاحلام كان ليها مفسرين كتير ولحد النهاردة و كتير بيعتبروها دلائل علي احداث هتحصل في المستقبل ده غير أن اختراعات كتير وروايات ولوحات بدأت بأحلام زي أشهر مثال جوجل اللي اخترعه طالب في جامعة Michigan اللي حلم في يوم انه قدر يحمل كل الويب علي الكمبيوتر ولما صحي حاول يثبت ده بشوية مسائل رياضية و لاقي انه الموضوع ممكن فعلاً وبعد سنتين قدر فعلاً يصمم جوجل ! واللي اكتشف ال DNA دكتور چيمس واتسون حلم بسلم حلزوني ومن هنا قدرنا نكتشف شكل ال DNA الحلزوني ! ومن اكبر واهم نظريات عصرنا نظرية النسبية لاينشتاين استوحاها من حلم ! حلم بأنه كان ماشي في مزرعة ولاقي مجموعة من البقر متجمعين حوالين سياج كهربي و المزارع شغل الكهربا فجأه فشاف أن البقر كله رجع لورا مرة واحدة في نفس الوقت مع أن المزراع شافهم بيرجعو ورا واحدة ورا التانية ومن هنا استتنتج أن الأحداث بتبدو مختلفة علي حسب المكان اللي أنت واقف فيه وده لأن الضوء بياخد وقت عشان يوصل لعينيك . وحتي الجدول الدوري الحديث اللي اخترعه ميندليف اللي قعد عشر سنين بيحاول يوصل لنمط بيجمع العناصر الكميائية لحد ما في يوم نام وحلم بجدول فيه العناصر كلها متجمعة في مكانها الصحيح وصحي كتبه زي ما هو ! واللوحة المشهورة The Persistence of Memory لأشهر فنانين السريالية وهي الجمع ما بين الواقع والعقل الباطن والأحلام ، ووصف لوحته دي علي انها حلم مرسوم واللي فيها عناصر واقعية زي الصخور اللي موجودة في الخلفية واللي بتمثل ساحل كاتالونيا . والرواية العالمية المشهورة فرانكشتاين ، كانت المؤلفة ماري شيلي عمرها ١٨ سنة لما كانت بتقضي الصيف مع زوجها بيرسي شيلي في سويسرا ومعاهم بعض اصدقائهم ومنهم الشاعر بايرون وكانو بيقضوا وقتهم في السهر وفي قراءة قصص رعب ألمانية وفي يوم أقترح عليهم بايرون ان كل واحد يكتب قصص رعب وبعدها بكام يوم كانو كلهم قاعدين حوالين النار بيتكلموا عن قصص الأشباح فنامت ماري وحلمت بجثث بترجع للحياه وشافت صورة واضحة لفرانكشتاين وأول ما صحيت كتبت اللي شافته وبمساعدة زوجها اللي كان كاتب برضو قدرت تتوسع اكتر في روايتها اللي بقت اشهر روايات الخيال العلمي والرعب بالرغم من انها فات عليها اكتر من قرنين ! كل ده بيثبت اد ايه الاحلام مهمة واد ايه فرقت كمان في تاريخ البشرية فيا تري ليه بتحصل وازاي ؟

الاول عشان نعرف لازم نعرف ازاي بنوصل لفقرة الاحلام في نومنا والفقرات اللي بتسبقه ، في بداية النوم بتعتبر انك لسه واعي بشكل ما ومتنبه للي حواليك في الوقت ده الدماغ بينتج موجات اسمها بيتا واللي بتبقي سريعة وصغيرة وبعدين بيبتدي الدماغ يهدا شوية وينتج موجات ابطأ اسمها الفا في الوقت ده ممكن تمر بتجربة غريبة جداً بتحصل مع ناس كتير وبتبقي زي هلاوس انك بتقع او حد بينادي عليك او انك تحس بانقباض مفاجئ في عضلات جسمك ودي حاجة شائعة جداً وبتحصل غالباً بسبب تفريغ لكهربا في الجسم أو لأن دماغك بيصور لنفسه صورة زي أنك بتلعب كورة مثلاً فبتنقبض عضلات رجلك عشان كده . بعد فترة الدخول في النوم دي بقي بيبدأ النوم فعلاً اللي بتمر فيه بأربع مراحل اول واحدة هي الNREM ودي مرحلة نوم خفيف بتعتبر انتقال من الصحيان للنوم في الوقت ده الدماغ بينتج موجات بطيئة اوي اسمها ثيتا وعامة الفترة دي صغيرة جداً حوالي ٥ ل ١٠ دقايق وغالباً لو صحيت حد فيها مش هيدرك أنه كان نايم أصلاً . تاني مرحلة بتقعد حوالي ٢٠ دقيقة وفيها بيقل الوعي بالمحيط بيك وحرارة الجسم بتنخفض والتتفس وضربات القلب بتبقي منتظمة اكتر وفيها المخ بينتج موجات منتظمة وسريعة وغالباً المرحلة دي بتمثل حوالي 50٪ من وقت النوم كله . تالت مرحلة العضلات فيها بترتخي والتنفس بيبطئ وضغط الدم بينخفض وبتعتبر مرحلة انتقال من للنوم العميق وفيها بيقل الوعي تماماً بالمحيطات وبالاصوات . في اخر مرحلة من النوم وهي الREM المخ بينشط فيها اكتر والجسم بيبقي مرخي اكتر ومبيتحركش والعين بتتحرك بسرعة ومعظم الاحلام بتحصل في المرحلة دي لان المخ بيبقي نشيط في المرحلة دي جداً فحين ان عضلات الجسم كلها مرخية ، بعد ما المرحلة دي بتعدي الجسم غالباً بيرجع للمرحلة التانية وبيكمل نوم . الاحلام هي هلاوسات بتحصل في المرحلة الرابعة من النوم وبالرغم من أنه دور النوم معروف في تنظيم الهضم والنوم وضغط الدم وجوانب كتير جداً إلا ان دور الأحلام مازال مش محدد ، زي ما عرفنا الدماغ بيفضل نشط في كل مراحل النوم خاصة في مرحلة الاحلام وبالرغم من كده احلامنا بتكون في اغلب الأحيان بعيدة عن المنطق وده غالباً لأن المراكز العاطفية في المخ هي اللي بتحفز الأحلام اكتر من المنطقية ، كتير فسر الاحلام انها افكار وصور مبنية علي اخر محادثاتك والظروف والأحداث الاخيرة اللي حصلت في حياتك ومفيش اسباب مؤكده لكن فيه بعض النظريات منها أنها بتحضرنا وبتهيأنا لمخاطر ممكن نتعرضلها وده لأن منطقة الاميجدالا بتبقي نشطة جداً في مرحلة الأحلام ودي المنطقة في المخ المسئولة عن الغريزة الدفاعية و الرد علي المخاطر وتكوين ذكريات بالمخاطر اللي اتعرضنا ليها وده اللي ببخلينا نحلم كتير بأحلام الهروب والجري وأحلام بمخاوفنا ولكن الحمدلله منطقة جذع الدماغ بتبعت اشارات عصبية لعضلاتك في الوقات ده عشان ترتخي بحيث متضربش وتجري وانت نايم . ونظرية تانية وهي انها بتساعدنا نوصل لأفكار إبداعية وده لأن الاحلام مفيهاش منطق ولا حدود زي الواقع بتاعنا فبتساعد اكتر علي الابداع وده بيفسر كمية النظريات والروايات واللوحات اللي تم ابتكارها عن طريق الأحلام . ونظرية تانية بتقول انها بتساعدنا نتعامل مع مشاعرنا وده لأن الأحلام بيتحكم فيها مراكز العاطفة في المخ اكتر وده بيفسر ليه الناس اللي بتعرض لحوادث وفقدان ناس عزيزة عليهم بيحلمو بده كتير وده يمكن تشجيع ليهم انهم يحكو عن تجاربهم دي لناس تانية في مجتمعهم تقدملهم مساعدة . فيه كمان نظرية بتقول ان الاحلام عبارة عن فلتر للذكريات بتاعتنا ازاي ؟ كل يوم بنتعرض لكمية احداث كتيرة جداً علي المخ انه يستوعب ويحفظ كل ده ويحوله من الذاكرة قصيرة المدي للذاكرة طويلة المدى فأثناء واحنا بنحلم دماغنا بيحاول يفلتر ويصنف الذكريات دي بحيث يحتفظ ببعضها للذاكرة طويلة المدي ويمسح الباقي فاثناء عملية الفلترة دي المعلومات بتختلط ببعضها وبتبان الصورة العامة غير منطقية . ونظرية أخيرة وهي أن دماغنا بيحاول يفسر المؤثرات اللي بنتعرضلها واحنا نايمين زي طفل بيعيط او اغاني شغالة ” وده بيفسر ليه بنحلم بصوت المنبه ومبنصحاش ” .

Lucid dreams :-دي نوع خاص من الأحلام بيكون الشخص قادر فيها يُدرك أنه في حلم وكمان غالباً يقدر يتحكم في الحلم ده بس الأحلام دي نادرة جداً ، نص الناس بتتعرضلها تقريباً مرة او اتنين في حياتهم ونسبة قليلة جداً بتتعرضلهم بصورة مستمرة . فيه كمان رابط اكتشفوه بين قدرة الشخص علي الإبداع والتخيل وبين تعرضه للأحلام دي .

الكوابيس :- غالباً الأحلام بتساعدنا نتعامل مع مشاعرنا او نواجه مخاطر ممكن نتعرضلها او تعمل زي فلتر للذكريات بتاعتنا وكل ده مفيد بس ساعات احلامنا بتبقي مخيفة وبتخلينا مضغوطين وخايفين اكتر وده ما يُعرف بالكوابيس فليه بنحلم بكوابيس ؟

الغريب انه الكوابيس بتبقي أحياناً مفيدة جداً وفي الغالب بيبقي هدفها تحميك وتوجه اهتمامك علي موضوع معين انت مش واخد بالك منه ممكن يأذيك . فهي وسيلة اللاوعي بتاعنا أنه ينبهنا للمخاطر ولأي قلق ممكن يحصلنا بالذات لو حد اتعرض لحادثة فالكوابيس بتكتر جداً في وقت ما بعد الحادثة ده بحيث انها تنبهك وتحاول تمنعك انك يحصلك نفس الحادثة تاني .

هل ممكن الأحلام تتنبأ بالمستقبل ؟

احياناً فعلاً الأحلام بتبقي حقيقة ولكن ده لي كذا تفسير منها انه صدفة او انه عقلك الباطن كان عنده معلومات فعلاً عن اللي هيحصل او ان مجرد حلمك بحاجة معينة بيشجعك تاخد الخطوات ليها وبالتالي يخلي الحلم يتحقق .

ليه بنضحك ؟
ممكن يكون سؤال فكرت فيه قبل كده لو انت حد بتحب تأڤور ثينكنج كتير كده زيي او ممكن تكون اول مرة يخطر علي بالك فا يا تري ليه بنضحك ؟
فيه نظريات كتير حوالين الموضوع ده منهم انه بدأ مع بداية الإنسان لما كان بيواجه مخاطر في بيئته كتير كان الضحك زي طريقة تواصل ما بينهم بأن الخطر زال ففسر بعض العلماء أن الضحك نابع عن تراكم لضغط انفعالي زي التعرض لخطر ” مش شرط خطر مادي ” ممكن حاجة مش متوقعة او مقبولة اجتماعياً ” وده بيفسر ليه النكت الخارجة بتضحك اكتر ” وبمجرد ما الخطر ده يزول الضغط الانفعالي ده بيزول بالضحك
نظرية تانية بتفسره بأن الإنسان بيحب يحس بعلوه ” superiority” فلما بيشوف حد بيعمل حاجة غبية او مش منطقية بيضحك لأنه حاسس ان الشخص ده اقل منه وانه مش هيعمل حاجة غبية كده ودي يمكن نظرية مبالغ فيها شوية ومش بتبرر كل المواقف .
اكيد برضو بنلاحظ اننا لو اتقالنا نكتة اكتر من مرة مش بنضحك عليها زي أول مرة خالص وده بسبب أننا اساساً بنضحك بسبب المواقف الغير متوقعة
ازاي ؟
دماغنا دايماً متوقع كل حاجة تحصل بطريقة معينة واللي هي غالباً الطريقة المنطقية فلما يلاقي حاجة حصلت بطريقة غريبة وغير متوقعة ” زي حد مثلاً وقع وهو ماشي” بيعمل ايه ؟
لأما يعتبر ده خطر وحاجة غريبة وتبتدي أجراس الخطر تشتغل ” اللي وقع ده كسر رقبته ” لأما بيتقبلها وبيبقي وقتها بقي دور الضحك لأن الحاجة دي خلاص لاقاها مش خطيرة ومش هتأذيه ” حد وقع ومحصلوش حاجة ” . وهنا بيبان أهمية عامل المفاجأه وأن النكتة لو اتكررت كتير غالباً مش هتضحك زي أول مرة . و من الحاجات المميزة في الضحك أنه اللي بيلعب دور كبير لي في دماغنا هو جزء أسمه ” الاميجدالا” وده مسئول برضو عن تكوين وتخزين الذكريات العاطفية لينا وبالتالي بيخزن الذاكرة العاطفية عن الوقت اللي حصل فيه الضحك و عشان كده دايماً اللحظات اللي بنضحك فيها بتبقي مميزة في ذاكرتنا وليها أثر لطيف علينا .
وبسبب كده كمان الضحك له أهمية كبيرة في حياتنا الإجتماعية و لي دور كبير في تقوية علاقتنا لدرجة أن بعض التجارب اثبتت أن كونك وسط مجموعة من الناس بيخلي احتمالية الضحك عندك اقوي تلاتين مرة من لو كنت لوحدك وحتي لو كنت وسط صحابك مش بتقولو أي حاجة تتضحك فوجودك بس وسط مجموعة بيشجعك أكتر علي الضحك من لو كنت لوحدك وهنا بيبان أوي الدور الإجتماعي للضحك .