أرشيف التصنيف:خيال علمي

الهندسة الوراثية بقت الثورة العلمية الجديدة في عصرنا واللي غيرت وهتغير مفاهيم كتير جداً . الأول يعني ايه هندسة وراثية ؟ هي تقنية بيتم فيها تعديل چينات معينة غير مرغوبة أو إزالتها خالص و استبدالها بأخرى مرغوبة . التقنية دي بتُستخدم من فترة كبيرة في تعديل چينات في النباتات وفي البكتيريا وفي تصنيع الأدوية وفي تجارب علي الحيوانات و فيه تشخيص وعلاج بعض الأمراض وفي عمل اللقاحات واللي عمل ثورة كمان في المجال ده هو تقنية كريسبر اللي تم اكتشافها سنة 2012 واللي خلت التعديل الچيني اسهل وارخص كتير وهي بتعتمد علي فكرة ان فيه بروتين اسمه كريسبر – كاس 9 بيعمل زي مقص وبيتخلص من الاجزاء الغير المرغوب فيها من الچينوم . ولكن الجزء المثير للجدل هو تعديل الچينات البشرية واللي بعد اكتشاف تقنية كريسبر كتير من العلماء اتجهو بشكل كبير للتفكير فيه بل وتجربته اللي مازالت غير مقننة في دول كتير زي الصين . زي أي تقنية من صنع الانسان فهدفها في البداية بيبقي هادف لتوفير وضع وحياه افضل للأنسان و لكن زي أي تقنية ظهرت فهي ليها جانب مظلم . الأول نتكلم عند أهدافها الكويسة وهي تقليل الأمراض بتعديلها وراثيا ً في الأجنة و بالتالي إطالة عمر الإنسان . الجوانب الظلمة ليها كتير أولها

* تأثيرها علي البيئة

زي أفلام الخيال العلمي بالظبط تخيل لو عملو كائنات معدلة چينياً عملت عدم توازن في البيئة أو الاسوأ لو بكتيريا أو ڤيرس معدل چينيا بقي مميت وعمل وباء عالمي .

*تأثيرها علي الإنسان نفسه

فيه احتمالية الخطأ البشري انهم بدل ما يستبدلو الچينات اللي فيها طفرة ، يستبدلو الچينات المهمة وبالتالي كارثة وكمان لو بقي مفيش تنوع چيني وبقي فيه كذا جيل مُعدل بنفس الچينات ونفس الطريقة . و كارثة تانية لو النباتات المُعدلة چينياً بقت مُفرزة لمواد بتسبب حساسية بالإنسان ممكن تبقي مميتة !

غير بقي التأثير الأخلاقي والإجتماعي ليها :- فكرة أنهم بيلعبو دور الإله وانهم بيعملو نباتات وكائنات معدلة چينياً منعرفش ايه تأثيرها علي المدي البعيد . ده غير أنه طالما حصل تعديل چيني مستحيل الرجوع عنه لو كان خطأ ! ده غير احتمالية حصول اوبئة بسبب الكائنات والبكتيريا المعدلة چينياً دي . وكمان وضع چينات بشرية في الحيوانات والنباتات بهدف زيادة سرعة نموها زي الفلفل والطماطم . فتخيل حد نباتي بياكل طماطم وهي فيها چينات بشرية! . ده غير انها كمان بتتضاف للخنازير وكمان الفئران بقت مُعدلة وراثيا ً بحيث أنها تُنتج حيوانات منوية بشرية . والحاجة المثيرة للجدل أكتر وتبدو كخيال علمي بحت هي الاستنساخ ومعناه إنتاج نسخة طبق الأصل من الأب اللي تم تجربته علي حيوانات بالفعل والخوف أنه يتم تجربته علي إنسان فتخيل معايا أنه طفل يطلع نسخة طبق الأصل من الأب واد إيه ده هيعمل كارثة إجتماعية وأخلاقية ، ده غير أنها ممكن تستخدم كسلاح في حروب الدول ضد بعضها .

فكرة التعديل الچيني بتقنية كريسبر قريبة جداً من فيلم خيال علمي كان بيتكلم عن أن التعديل الچيني في المستقبل بقي متاح وانه بقي فيه عنصرية وتفرقة كبيرة ما بين الناس اللي اتولدت بالطريقة الطبيعية وبين الناس المُعدلة چينياً . مع كل الجوانب الجيدة والسيئة الهندسة الوراثية فهي مازالت في تقدم مستمر و السؤال دلوقتي هل هنلاقي سيناريو لفيلم خيال علمي بيطبق فعلاً في المستقبل ؟

* أسم الفيلم :-gattaca